Te'âlellâh zihî devlet-serâ-yı ıstıfâdur bu Güzîde-câ-yı ârâm-ı Nebiyy-i Müctebâ'dur bu Egerçi sath-ı arz üzre velî fevka'l-'ulâdur bu Dahîlek kûy-ı acz ol ki melâz-ı inticâdur bu “Sakın terk-i edebden kûy-ı Mahbûb-ı Hudâ'dur bu" "Nazargâh-ı İlâhîdir makâm-ı Mustafâ'dur bu”
Bu câ-yı pür-şeref nezd-i hakâyık-bîn-i dikkatde Hakîkat Beyt-i Ma'mûr'a müraccahdır şerâfetde Odur çün Kıble-i dildâgân râh-ı mahabbetde Ne şübhe Kâ'be'den ber-ter gelir mikyâs-ı rif'atde “Habîb-i Kibriyâ'nın hâb-gâhıdır hakîkatde" "Tefavvuk-kerde-i arş-ı Cenâb-ı Kibriyâ'dur bu”
Melekler pâsbândır âsitânında bi-lâ-fâsıl Ki âğûşunda olmuşdur o mâhı hâle-veş hâmil Beni çün eyledin yâ Rabb O'na yüz sürmeğe nâil Füyûz-ı hâk-i kudsünden bırakma çeşmimi âtıl “Bu hâkin pertevinden oldı deycûr-ı adem zâil" "Amâdan acdı mevcûdât çeşmin tûtiyâdur bu”
Mutahhar Ravzası bâğ-ı bihiştin reşk-nâkidür Karînü'l-ayn iden cân-ı hazîni hâk-pâkidür O Hadrâ Kubbe ki genc-i defînin evce hâkîdür Onun şevkı-y-le gör ebri nasıl sûzişle bâkîdür “Felekde mâh-ı nev Bâbu's-selâm-ı sîne-çâkîdür" "Anun kandîli Cevzâ matla-'ı nûr u ziyâdur bu”
Hulûs-i kalb ile Tâhir dem-â-dem yalvar Allah'a Seni tekrâr sevk itsin dil-efkârâne ol râha Şeref-yâb oldığın demde O âlü'l-âl olan câha Salât-i müznibânen eyleyüp takdîm O Şâh'a “Mürâ'ât-ı edeb şartı-y-la gir Nâbî bu dergâha Metâf-ı kudsiyândur buse-gâh-ı en biyâdur bu”
[Nâbî]; Tâhiru'l-Mevlevî |
Bu yolda ve bu uğurda beraber olmak dileğiyle…
"Ne yanar kimse bana âteş-i dilden özge
Ne açar kimse kapım bâd-ı sabâdan gayrı"